Joh 14 | KMG | STEP | “Ŋoŋe fâfârerâ maŋŋeŋic mi gâckezejec. Anutu manasiŋkehuc no mâmâc manasiŋnunšepieŋ.

John 14

Mâmâzoc dâŋ: 1. Ŋeŋe-nâŋec hewâneŋkeekac

1 “Ŋoŋe fâfârerâ maŋŋeŋic mi gâckezejec. Anutu manasiŋkehuc no mâmâc manasiŋnunšepieŋ. 2 Mamac-nanere hae qizecko fic bocjaha ŋerakac. Iŋuc mi fome muzac, ŋeŋe hewâneŋke-ŋarezo rapemu, i moc ŋazazapo me? 3 Eme ra ŋeŋe hewâneŋke-ŋarerâ mocwâc risie warerâ jowac-ŋopape rarâ no jupemuoa junšepieŋ. 4 Rapemu hata i honeeŋgopieŋ.” 5 Mume Tomazi šiŋuc âzâcnewec: “Go wena racmu, i nâŋe mi manaŋgopeneŋ, irec wemocko hata honenaŋmu.” 6 Eme Jesuzi šiŋuc âzâcnewec: “Hata â dâŋ fâri qizec â juju irec rune no. No nowarurâ Mamactao fifisi i mi fokac. 7 Ŋoŋe juwicnao no šâŋitacnurâ muzac Mamac-nane iŋuc jaha šâŋitanšapiŋ. Ʒi ine Mamac-nane šâŋitarâ mana taraŋgopieŋ.” 8 Iŋuc mume Filipozi šiŋuc muwec: “Go Mamac nâwotutec honerâ manapene taraocmu.” 9 Eme Jesuzi muwec: “Filipo, no dameŋ šora ŋoŋehec juhape go mi hone tarac-nukomec? Moc e no honecnuekaczi Mamac honeekac. Eme go wemocte šiŋuc mukomec: `Go Mamac nâwotutec honenaŋ'? 10 Mamaczi no maŋnuekac â noni Mamac maŋkeekopac i mi mana šakiekic me? Dâŋ ŋazaekopac i nahacne maŋte mi ŋazaekopac, Mamaczi nore maŋko juhuc gie-ticne baekac. 11 Mamaczi no maŋnuekac â noni Mamac maŋkeekopac, dâŋ i manapie fârine ezejec. Me miczi mupe mi sâcŋopakacko wiac bapa-nanere erâ dâŋ i mana šakieniŋ.

2. Neŋgoc ŋesiŋ moc wahaocte muwec

12 “No jâmbomac jâmbâŋ mupe mananiŋ: No manasiŋnuocmuzi gie baekopac ijaha baocmu. Erâ i sawa mâcne, sâcnane jâuruhuc baocmu. No Mamactao fepemure iŋuc hâcne fuaocmu. 13 Eme ŋoŋe nore šâŋe bajuhuc numupie sâc mana-ŋarehuc epemu. I Mamacte mumuteŋ Ŋokâre erâ fuaocte iŋuc epemu. 14 Ʒâŋe-nane bajuhuc numu-narepie mana-ŋarehuc epemu. 15 Maŋŋeŋic nore qikiŋneeŋgopieŋko micnane reŋkeniŋmu. 16 Eme noni Mamac numucnepe neŋgoc ŋesiŋ-ŋeŋic moc soreme waharâ ŋoŋehec juhuc juocmu sanaŋ. 17 Dâŋ fâri qizecnere Mâro hâcne. I miti tâmiriczi rorone mi fokac. Jaŋe e mi hone taraeŋgopieŋ â e mi mana taraeŋgopieŋ. E ŋoŋehec juekaczi maŋŋeŋicko hurâ juocmu, irec ŋoŋe e kâuc mi baeŋgopieŋ. 18 No behec-ŋopape bekâ mâsiŋ erâ mi juniŋmu. No ŋoŋerao risie warepemu. 19 Dameŋ bembeŋne mac moc fokac, i tarame miti tâmiriczi mocwâc mi honecnuniŋmu. Ŋoŋe ine honecnuniŋmu. No juju sanaŋ jukopac, irec ŋoŋe iŋuc jaha ɋâricne juraniŋmu. 20 Dameŋ ira, Mamaczi no maŋnuekac â noni ŋoŋe maŋŋopaekopac, â ŋoŋe no maŋnueŋgopieŋ i mana taraniŋmu.

3. Jesuhec maŋmaŋ ezo

21 “Moc e micdâŋ-nane bajuhuc sâseocmu, eki maŋjauŋ enareocmu. Eme moc e no maŋjauŋ enareme Mamac-nanezi e iŋuc jaha maŋjauŋ ecneocmu, â no nahac wâc maŋjauŋ ecnehuc fuŋne-nane mutaniŋkecnepemu.” 22 Iŋuc mume Juda Karioto haeonec ere wasezi wiocnerâ muwec: “Wofuŋ, go weniŋuc erâ fuŋnege nâŋerao sawa bataniŋkehuc ŋic gâcne sâko jaŋe hesoŋke-jarezo mukic?” 23 Mume Jesuzi dâŋ šiŋuc bâtikiecnewec: “Moc e maŋjauŋ enareocmuzi dâŋnane mana rereŋ eocmu. Eme Mamac-nanezi e iŋuc jaha maŋjauŋ ecneocmu. Eme nâhe mâmâc erao fisirâ ŋeŋe juju enacmu. 24 Moc e maŋjauŋ mi enareocmuzi dâŋnane wemocko mana rereŋ eocmu. Erâ dâŋ ŋazaekopac i no nahacnaonec mâcne, i Mamac sorecnuwec eraonec.

4. Jesuzi wama fârine nâreekac

25 “No nahac ŋoŋehec juhuc dâŋ iŋucne ŋaza qazuc eekopac. 26 Eme neŋgoc ŋesiŋ Tiri Mâro hâcne e Mamaczi nore micte soreme waharâ dâŋ sasawa ŋaza qazuc eŋareocmu, â noni ŋazaekopac i heɋâre-ŋare-fâreocmu. 27 No merâfâc-nane wama ŋarekopac, ŋic wama mâcne, no nahacne wama jâmbâŋ ŋarekopac. Irec maŋŋeŋic mi fâfârerâ gâckezejec. 28 No kecšiŋuc ŋazape manambieŋ: `No rarâ juku ŋoŋerao mocwâc risiepemu. Ž Ŋoŋe maŋŋeŋic nore qikiŋnerâ muzac, ine Mamactao fepemu i manarâ bubiaŋ bâfuanšapiŋ. Mamac e nore femicne jukacte manasuhuc iŋuc enšapiŋ. 29 Ʒi fârine mi fuaha qanaŋ ŋazakopac, irec fuame honerâ mamanasiŋ-ŋeŋic sanaŋkezejec. 30 No ši dâŋ bocjaha mi šuhuckerâ ŋazapemu. Mâreŋ širec ŋicbomboŋ wareocte šawiekac, warerâ norao hetakireocmu. 31 Eme Mamac maŋjauŋ ecnehuc gie munarewec baekopac i miti tâmiriczi hone taraniŋte faharepie ranaŋ.